Ante a mentira e a demagoxia da Alcaldesa na prensa: O PP de Moraña SÍ aplica e permite as subas de impostos.

A subida do recibo de auga, recollida de lixo e sumidoiros en Moraña son desgraciadamente datos obxectivos. Datos que poden corroborar aqueles veciños e veciñas que recibiron nas súas casas os recibos para facer o devandito ingreso. De feito os recibos que se están a pasar incrementan o custe nun 135% ao respecto dos últimos recibos, pois pásase de 70, 25 € a 165,42 €. Ademais, lembramos que o PP aplica os novos tributos aprobados por Lei, que son o canon da auga e coeficiente de vertedura, e que o PP de Moraña aplica sen contemplación e clara obediencia partidista.

O catastrazo tamén se aplicou en Moraña polo PP. Dato que tamén poden contrastar todos os veciños e veciñas que recibiron a taxa de 60 €. Na maioría dos casos das notificacións comunicáronse as valoracións dos ben inmobles, e que supoñerán a suba do Imposto de Bens Inmobles (IBI) en Moraña. A posición obediente do PP contrasta coa doutros concellos, onde non se permitiron actualizacións catastrais, precisamente para evitar a suba do IBI para os veciños e veciñas.

Cómpre lembrar aquel convenio da recollida do lixo que PP pretendeu asinar en Moraña. Naquela situación o PP pretendía acollerse a un convenio no que con menos servizo de recollida pasabamos a pagar 120 €/vivenda. O BNG rexeitouno desde o primeiro momento con contundencia por ser contrario aos intereses dos nosos veciños e veciñas. E ao final ó Partido Popular non lle quedou outra que botarse atrás.

Estas cuestións obxectivas contrastan coa demagoxia que emprega o PP de Moraña, e en particular a Alcaldesa, pois trata de embarrar a política e culpabilizar aos grupos políticos da oposición de trasladar información enganosa. Nós rexeitamos contundentemente e con datos reais este novo intento de engano e manipulación aos veciños e lamentamos a propia confusión que ten a Alcaldesa de Moraña, pois temos que lembrarlle que quen emprega as institucións para subirlle os impostos a veciños e veciñas é o PP., partido político ao que ela e o seu goberno pertencen e do que defenden as súas políticas e decisións con claridade e nitidez, polo que non pode vir agora mirando para outro lado e tratar de embarrar e confundir as cousas e moito menos culpabilizarnos a nós do que o PP aplica no noso Concello.

Os usuarios da Escola municipal de Música teñen acumulados 4 meses sen que se lle pasaran os recibos domiciliados.  Este feito é un novo exemplo do desastre de xestión que está a realizar o PP de Moraña, que, hai que lembrar que a través do goberno municipal,  adoptou en primeiro lugar e de xeito unilateral e sen preguntar nin informar, a decisión política de facer as clases de instrumento da Escola de Música non individuais.

Neste senso, o 3 de outubro de 2014 aprobábase por unanimidade da Corporación Municipal de Moraña a moción do BNG na que se insta ao goberno municipal a buscar solución para a impartición de clases individuais de instrumento, ou de non ser posible acordar a aplicación das taxas establecidas na ordenanza reguladora: Alumnos sen clase individual de instrumento 20,00 euros.

O goberno municipal do PP  foi incapaz de buscar unha solución acaída a un problema que xeraron eles, e segue a dar mostras dunha mala xestión municipal, pois desde o mes novembro non se volveron a cobrar as taxas polos servizos municipais da Escola de Música (ESMU),  cuestión que provoca  que haxa acumulados 4 meses sen pasar os recibos domiciliados. Esta cuestión vai dificultar o pago acumulado por parte das familias. Seguir lendo O goberno municipal está a realizar unha xestión nefasta da ESMU →

O PP efectiviza en Moraña o canon de auga e coeficiente de vertedura nos recibos da auga.

Dende o BNG estamos a recibir queixas veciñais pola suba importante dos recibos de auga, recollida de lixo, sumidoiros, coeficiente de vertedura e canon de auga.

A cuestión é que o PP a pesar do que nos intenta vender, e máis en época electoral, está a subir indiscriminadamente os impostos e taxas aos veciños e veciñas do noso Concello.  Non hai moito que os veciños e veciñas foron notificados da variacións de valoracións catastrais de bens inmobles e que consecuentemente terá repercusión no recibo do IBI.

Agora, os veciños e veciñas do noso concello están a recibir a emisión de recibos para o pago de auga, recollida de lixo e sumidoiro, aos que lle suman as taxas de coeficiente de vertedura e canon de auga, e que fan incrementar os recibos considerablemente, chegando en casos ata un 135% no incremento.

Dende o BNG de Moraña lamentamos esta forma de facer política do  goberno municipal do PP coa súa alcaldesa ao fronte, primeiro por non ter informado aos veciños e veciñas desta suba, e segundo, por incumprir o seu programa electoral, onde se comprometía a non subir os impostos e taxas municipais.