O PP efectiviza en Moraña o canon de auga e coeficiente de vertedura nos recibos da auga.

Dende o BNG estamos a recibir queixas veciñais pola suba importante dos recibos de auga, recollida de lixo, sumidoiros, coeficiente de vertedura e canon de auga.

A cuestión é que o PP a pesar do que nos intenta vender, e máis en época electoral, está a subir indiscriminadamente os impostos e taxas aos veciños e veciñas do noso Concello.  Non hai moito que os veciños e veciñas foron notificados da variacións de valoracións catastrais de bens inmobles e que consecuentemente terá repercusión no recibo do IBI.

Agora, os veciños e veciñas do noso concello están a recibir a emisión de recibos para o pago de auga, recollida de lixo e sumidoiro, aos que lle suman as taxas de coeficiente de vertedura e canon de auga, e que fan incrementar os recibos considerablemente, chegando en casos ata un 135% no incremento.

Dende o BNG de Moraña lamentamos esta forma de facer política do  goberno municipal do PP coa súa alcaldesa ao fronte, primeiro por non ter informado aos veciños e veciñas desta suba, e segundo, por incumprir o seu programa electoral, onde se comprometía a non subir os impostos e taxas municipais.

A Rotonda dos 44.000 euros en axardinamento e esculturas, sen luz de novo.

Dende o BNG  de Moraña vimos observando que nos últimos días que a rotonda da Chociña carece de iluminación.  A citada rotonda fai de entronque entre a PO-226 co novo treito da PO-221 (Moraña-Caldas de Reis), constituíndo pois unha infraestrutura de elevado tránsito de vehículos.
Para o BNG a falta de iluminación neste punto constitúe un auténtico perigo para seguridade vial. Consideramos necesario resolver de xeito urxente esta anomalía antes de que haxa que lamentar posibles accidentes. Non podemos admitir que nunha rotonda onde o goberno municipal ten priorizado obras e actuacións cuns elevados investimentos, non teña as máis mínimas garantías de seguridade nin teña un alumeado acorde á súa situación.

Desgraciadamente unha vez máis, o goberno municipal do Partido Popular actúa con total incoherencia, planificando iluminación para lugares innecesarios e deixando de lado os que o máis precisan.
Foi precisamente gracias ás reiteradas denuncias públicas e á presión política do BNG no pasado a que fixo que se dotara de iluminación neste punto do noso entramado viario. E non podemos admitir anuncios electoralistas do PP sobre aforro na factura eléctrica do alumeado cando o servizo é precario.  Por todo isto  desde o BNG emprazamos publicamente ao goberno municipal para que resolva a falta de iluminación deste punto da rede viaria de Moraña de xeito urxente.

O noso voceiro municipal Marcos Suárez  visitou o pasado martes aos veciñ@s da Urbanización Dehesa de Campenlos situada na rúa 7 de Santa Lucía. a visita. Suárez reuniuse co conxunto de veciñ@s e recolleu a súa queixa unánime en canto ao estado da urbanización e as promesas incumpridas por parte da Alcaldesa, que leva ano e medio prometéndolle “solucións” a estes veciños sen que a día de hoxe se teña producida a máis mínima mellora.

Os veciños amosáronlle ao noso concelleiro  o pésimo estado do entramado viario da urbanización e a inexistencia de alumeado público nesta zona. Ademais, o vial da urbanización presenta unha plataforma de moi pouca calidade que xa provocou nalgún caso pequenos danos nos vehículos no entronque da saída dos garaxes polas irregularidades que presenta.

O noso voceiro tamén puido constatar in situ o estado do pavimento do vial desta urbanización, un pavimento máis propio de outra tipoloxía de viais como poden ser os rurais, e tamén o lamentable estado da parcela urbana situada ao sur destas vivendas unifamiliares e que está chea de vexetación espontánea que fai que bichería de diverso tipo (culebras, ratas etc) acoda alí como hábitat natural, lembrando que nesta zona urbana residen varios nenos e nenas.

Dende o BNG-MORAÑA estamos elaborando xa unha moción a este respecto que presentaremos no vindeiro pleno esixindo que o goberno municipal cumpra as súas promesas e adopte as medidas urxentes e necesarias e resolva coa máxima celeridade posible tódalas deficiencias existentes nesta zona urbana.

O BNG trasladoulle ao goberno municipal de Moraña a necesidade de coñecer os efectos sobre os cidadáns do catastrazo. O goberno sempre minimizou o impacto económico que tería para os cidadáns alegando que so supoñía unha regularización.

No BNG sempre botamos de menos a grave falta de información  a todos os veciños e veciñas, polo que consideramos que ao PP interésalle que algunhas cousas non se saiban, sobre todo se teñen que ver coa aplicación de taxas e impostos que graven aos cidadáns do noso concello.

A día de hoxe xa foron notificados moitos veciños e veciñas  de Moraña con propostas de resolución de alteración catastral, acompañada en todos os casos dunha taxa de regularización de 60 € por inmoble. É importante sinalar que os efectos derivados da regularización poderán trasladarse nos recibos IBI dos últimos catro anos. Seguir lendo O goberno municipal permite unha nova suba encuberta de impostos →

Na sesión plenaria do día 5 de decembro o goberno municipal confirmáballe ao BNG a falta dun plan municipal de obras para a mellora de viais municipais en previsión do ano 2015. Para o BNG confírmase a nula xestión ou mala planificación do mantemento dos viais municipais por parte do goberno municipal ao non ter previsións e obxetivos establecidos.

No BNG consideramos prioritario que os veciños e veciñas dispoñan dunhas infraestruturas viarias en bo estado de mantemento, para que incida directamente na seguridade vial e na mellora calidade de vida de todos os cidadáns. Por iso reiteramos a nosa proposta de realizar un plan de mellora das infraestruturas viarias, pois moitas delas están intransitables e necesitan novos pavimentos e limpezas.

Así por exemplo hai numerosos lugares de todas as parroquias onde o pavimento dos camiños está intransitable, e necesitan dunha actuación urxente de repavimentado e limpeza de gavias. Por exemplo na paraxe da Rapeira no Lugar de Vilacoba da parroquia de Amil (na imaxe) os baches son extremadamente grandes e con gran profundidade, e non poden esperar a un Plan electoralista como é o Plan Marco da Xunta de Galicia.

[UN TOTAL DE 7612,43 € É O QUE NOS CUSTA, AO CONXUNTO DE VECIÑ@S, COLOCAR A ESCULTURA NA ROTONDA DA COCIÑA VENDIDA POLO PP COMO “CUSTE CERO”]

Mentres o goberno municipal de Moraña defendeu que a colocación  do Conxunto Escultórico alusivo á Festa do Carneiro ao Espeto non tería custe económico para o noso Concello, o BNG puido comprobar
que supuxo para as arcas municipais un gasto de 7.612,43 €, ao que teríamos que sumar os máis de 37.000 € investidos no axardinamento  da rotonda.

É por iso que dende o  BNG censuramos, primeiro que, o PP mentise burdamente aos veciños e veciñas de Moraña, e segundo, criticamos este gasto, que cualificamos como un auténtico despilfarro, xa que o goberno municipal de Moraña ten de sobra onde priorizar os investimentos para atender os servizos públicos que xeren unha mellor calidade de vida para os veciños e veciñas servizos públicos como son as conexións de saneamento, mellora do alumeado público, mellora de viais, abastecementos de auga, etc…

Alén disto vemos como o PP non ten o máis mínimo reparo en gastar os cartos de todos e todas en cuestións innecesarias, cando ten  desatendidas, cando non totalmente esquecidos, outros ámbitos  como o cultural, educativo, musical, ou a mocidade. A indecencia e o cinismo da Alcaldesa e do seu grupo de goberno non teñen límites. Minten con total impunidade e despilfarran os nosos recursos, neste caso case 8.000 euros ao que teriamos que sumar aqueles 37.000 gastados en “axardinar” co resultado que tod@s coñecedes. Inaceptable.

Enlace a esta nova no Faro de Vigo